App altoadigemobilità con convalida online

Cun le Südtirol Pass vára sëgn da convalidé ince online

"südtirolmubiltà" á de plü novités danman

N pröm vare devers de n ticketing mobil, n design cun corusc implü y i inoms dles architades sön les chertes - chëstes é sëgn les novités sön nosta plata web y app.

La plata web y la app südtirolmubiltà vëgn tresfora laurades fora y svilupades inant. Por podëi fá chësc é sambëgn le feed-back de nosta utënza de gran valüta por nos y an mëss dí che cotan é cina sëgn bele gnü metü en pratica. Cun chësta ultima ediziun unse injunté al design corusc implü. Insciö devënta la chirida dl orar plü saurida y ince la navigaziun é strotorada te na manira plü tlera.

Sön la cherta vëgnel sëgn ince dé dant i inoms de dötes architades. Dantadöt por che che s'un capësc fora él a chësta moda sëgn ciamó plü saurí da ciafé les architades che an ó sön les chertes o sön les odüdes da satelit y da s'un capí fora bun canche an roda incërch.

Sëgn vára da convalidé ince sön le smartphone

La maiú novité vá devers dl ticketing mobil: da atira inant á che che á n Südtirol Pass o n Euregio Family Pass la poscibilité implü da convalidé bele damperfora le iade cun le bus o cun la ferata tres le smartphone. An ne á insciö nia plü bria da jí a convalidé le iade pro n automat denanco pié ia, por ejëmpl sce al é tröpa jënt dan n automat o i automac de convalidaziun n'é nia dailó dlungia.

Proscimamënter podarán ince convalidé digitalmënter sön n valgönes linies dl bus. Da mez novëmber o da mez dezëmber inant sarál na fasa de transiziun porvia dl'organisaziun nöia di sorvisc de bus regionai y dailó rodarál n valgügn bus zënza aparac de convalidaziun. Che che é ausá da tó le bus podará impó adoré inant so Südtirol Pass y Euregio Family Pass ala tarifa che ai á propi deache al é la poscibilité da convalidé te na manira mobila.

La digitalisaziun vá inant debota y standards nüs röia ite te düc i seturs dla vita y dl'economia. Insciö ti él gnü dé n'importanza particolara al'introduziun dl ticketing mobil y al'adoranza dles tecnologies digitales ince tla mobilité publica dl Südtirol y tl ann che vëgn gnarál ciamó fat vari surapró de chësc vers a livel plü ampl. Por döta la jënt che tol le bus o la ferata ó chësc dí che tl dagní podarára se möie te na manira daldöt independënta dai automac por les chertes de iade y dai automac de convalidaziun y ara ará na flessibilité mascimala da adoré i mesi publics. Cun chëstes tecnologies nöies gnarál complessivamënter fat ciamó n salt de cualité implü devers de na mobilité coliada te na manira inteliënta, smart y che scona le clima.

Convalidé le Südtirol Pass online – an fej insciö:

Pian ia dala chirida online de n coliamënt vára da prenoté, convalidé y en caje storné canchessî le iade che an ó cun le bus o cun la ferata cun ma püc clics cina alplü tert n menüt dan la partënza aladô dl orar. Por le control dla cherta él da ti mostré le smartphone cun le "iade atif" al ciafer o ala ciaferia dl bus o al personal de control.

Informaziuns plü detaiades é da ciafé chiló

Al é madër da porvé fora: chiló él le video

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.