Retuda o bon
Nosc servisc tlienc ie for tlo per vo
Nia for ne va dut coche l dassëssa, uni tecnica possa nce falé datrai. Sce la chertes de viac o i njins de cunvaldizion ne va nia: L servisc tlienc südtirolmubiltà ie for tlo per vo.
Dumanda de retuda: Scencajo che l passajir/la passajira ëssa paià per n viac n priesc massa aut y chësc possa unì desmustrà, vën la soma curespundënta repurteda coche bon sun l Südtirol Pass o paieda tres banca. La dumandes de retuda vën for ejaminedes singulermënter y les possa unì mandedes ite tres chësc formuler.
Chertes de viac che resultea “nia da liejer” pra l njin de cunvalidazion o che ne vën nia azetedes, ma che ne semea da dedoravia nia danejedes, possa unì baratedes ora pra la lueges de venduda cun chertes nueves dla medema sort cun l valor curespundënt ala soma resteda lessù.
Südtirol Pass / Euregio Family Pass: Chiche ne uel nia slungë l tëmp de validità de n Südtirol Pass (cherta prepaid) possa te uni mumënt se damandé la retuda dla soma mo resteda sun la cherta pra la lueges de venduda südtirolmubiltà y dé ju la cherta.
La chertes Mobilicard / museumobil Card / bikemobil Card y la chertes per n di per la rodes ne vën nia retudes.
Tardivanzes y suprescions de curieres o ferates
Sce l ne ie nia puscibl fé o finé n viac pervia de ntraunides o situazions nia preududes, che ne ie nia da atribuì ala mpreja de trasport, ne à i/la passajires de regula nia la rejon de se damandé la retuda dl priesc dl viac o l slungiamënt dla validità dla cherta de viac.
Tl cajo de viages cun la ferata possa i/la passajires damandé la ndenisazion dla spëises dl viac sce l ie na tardivanza de plu che 60 menuc sun la trassa danter la lueges de partënza y de destinazions dates sëura sun la cherta de viac y sce l ne ie mo nia unì retù l priesc dl viac. La ndenisazion ie dl 25 percënt dl priesc dl viac pra na tardivanza da 60 a 119 menuc y dl 50 percënt dl priesc dl viac per na tardivanza da 120 menuc insù.
Deguna rejon de ndenisazion ne àn sce n ie bele unic nfurmei dla tardivanza dan che n à cumprà la cherta o sce n ruva a destinazion cun na tardivanza de manco che 60 menuc ajache n pudova se nuzé, per furné inant, de n auter servisc de trasport o fajan l viac sun n’autra trassa. Tl cajo de somes sota 4 Euro ne vëniel nia fat ndenisazions.