Bel plan s’avijinëia l’ann de scora nü. I abo+ dles scolares y di scolars dess bele sëgn gní arlungiá o damaná do por schivé da messëi dedô se spazé.
Le scomenciamënt dla scora, ai 15 de setëmber é vigni ann le de che al vëgn controlé la validité dl abo+ dles scolares y di scolars. Cina a chësta data vel ince chësc ann i 70.000 abo+ che ê gnüs ativá. Porimpó paiel la mëia da se cruzié dl arlungiamënt por tëmp y ora, y sce ara vá bele sëgn. I pröms dis de setëmber é sovënz caotics. De regola él dër tröpa jënt che vá dai zëntri di utënc de südtirolmubiltà y cherda sö y i sistems de dac é suraciariá.
Döt online
L'arlungiamënt anual di abo+ y ince les domandes nöies vëgn fates ma online sön chësta plata web y funzionëia sides cun o zënza azes digital (SPID o cherta di sorvisc ativada y letur). Chësc ann él gnü fat a na moda che al sides ciamó plü saurí da s’anuzé dla prozedöra online, dantadöt por ci che reverda les domandes fates cun le cunt dl utënt y tres le paiamënt bancar.
La tarifa anuala de 20 euro por scolares y scolars o de 150 euro por che che stüdia pó gní paiada online cun cherta de credit, tres ordin bancar, home-banking o ince diretamënter pro la portina dles chertes y te val’ posć de venüda de südtirolmubiltà.
Bun da savëi
abo+ por che che stüdia: por le Südtirol Pass abo+ de che che stüdia al’université n’él sëgn nia plü n termin de validité fis. Chisc abo+ pó gní damaná o arlungiá canchemai. Ai vel n ann y 14 dis pian ia da canche an á paié la tarifa anuala.