Dal 1. d’otober inant: Cun l’abonamënt dl’Euregio pó che che stüdia tl Südtirol, Tirol y Trentin jí incërch a na moda flessibla respetan le clima.
Por l’assessur provinzial por la mobilité Daniel Alfreider é l’Euregio Ticket Students n „capitul nü por l’Euregio y la mobilité publica“ che pëia ia sciöche scomenciadia coletiva al 1. d’otober te düc trëi i raiuns provinziai. Cun 430 euro al ann pón s’anuzé a na moda flessibla de düc i mesi dl trasport publich tl Südtirol, tl Tirol y tl Trentin. “La colaboraziun sura les provinzies fora tl ciamp dla mobilité sostignibla é n punt zentral tl’Euregio”, sotrissëia Alfreider. Do l’ampliamënt di coliamënc dla ferata ón sëgn condüje inant la cooperaziun pro i sistems dles tarifes y dles informaziuns tl trasport publich, sciöche al é ince preodü danterater te na deliberaziun dla sentada deboriada.
Coliá tl’Euregio
Scomenciadies coletives él bele, pro chëstes toca de plü ediziuns dl De dla mobilité dl’Euregio, olache tröpes porsones s’á anuzé ti agn passá de chësta poscibilité por jí a ti ciaré cun le bus o la ferata ales provinzies vijines. L’ann passé él rové pormez la cherta dl de „Euregio 2 Plus“: la pröma cherta de iade por jí sura i confins dles provinzies fora, cun chëra che podô rodé n de intier alplü de cinch (3 mituns/mitans sot i 15 agn y 2 porsones adultes) te döta l’Euregio.
„Cun l’abonamënt anual dl’Euregio s'avijinëia l'Euregio por che che stüdia sëgn ciamó deplü, ara se trata de n segnal tler por na mobilité che vá sura les provinzies fora y respetëia le clima. Insciö sostignunse ince a na moda sostignibla le lian danter porsones, grups linguistics y provinzies“, sotrissëia l’assessur provinzial Landesrat Alfreider.
Euregio Ticket Students: Insciö vára
L’abonamënt anual nü "Euregio Ticket Students“ pó se lascé fá che che stüdia te n’université o n' istituziun de formaziun ecuipararada tl’Euregio y n’á nia ciamó cumplí 28 agn. La domanda é da fá, avisa sciöche ince por le Südtirol Pass abo+ tres formulars online sön la plata web www.suedtirolmobil.info o le “Verkehrsverbund Tirol (VVT)”. Che che á bele n Südtirol Pass abo+, pó damané l’Euregio Ticket Students paian 280 euro y ciafa spo na cherta nöia.
Por i abonamënc dl’Euregio dá fora tl Südtirol velel sön i mesi dl trasport publich tl Südtirol i medemi criters de validité y adoranza co cun le Südtirol Pass abo+. Chësc ó dí: al tleca fá le check-in denanco jí cun le bus o ferata. Tl Tirol y tl Trentin deperpo mëss l’Euregio Ticket Students dé fora tl Südtirol ma gní mostré sö; ma por jí cun la ferata devers dl Südtirol él da timbré tles staziuns de Trënt, Desproch, Sillian y Lienz.
Sce an ó pón ativé la funziun de paiamënt por paié impara le sorvisc da se tó para la roda o tiers tl Südtirol, sciöche ince por fá iadi cun le nightliner.
Scenó velel por le Euregio Ticket Students pro i iadi cun le bus y la ferata de regola i criters d’adoranza dla provinzia olache an é. Al é da tigní cunt dantadöt dles desposiziuns desfarëntes por ci che reverda les ferates che vá lunc, y le tó para la roda o tiers sön mesi dl trasport publich.
Dötes les informaziuns sön l'Euregio Ticket Students é da ciafé sön la plata web www.suedtirolmobil.info, düc i detais sön les condiziuns d’adoranza tles provinzies vijines é da ciafé sön la plata web dla mobilité dl Tirol www.vvt.at y dl Trentin www.trentinotrasporti.it