Nuef: Widget-orares per ti plata web

Sun uni plata web possen śën njunté n viere per crì i orares y avëi nsci n link diret al portal dla mubiltà.

Co possa pa i ghesć arjonjer miec cun la curiera o la ferata ti strutura o l luech ulache te stes y lëures? Ce pusciblteies iel pa per furné ncantëur tl Südtirol respetan l ambient? Chi che uel ti mëter a cuer a si ghesć y tlienc la ufierta dl trasport publich local possa śën cuncé ite sun si plata web n widget-orares dla südtirolmubiltà. A chësta maniera se gëura per i users diretamënter la porta per i orares dla curieres y dla ferates tl Südtirol y per duta la nfurmazions n cont dla mubiltà publica locala.

La sustenibltà y la mubiltà publica ie tematiches tle

“Truepa aziendes, urganisazions y strutures, dantaldut tl ciamp dl turism, se damandova n tel widget. Chësc mostra che la tematiches dla arjunjibiltà y dla sustenibiltà ie tl Südtirol fatores tle y che la mubiltà publica à n na gran mpurtanza“, tlarësc Patrick Dejaco, diretëur di sistems de nfurmazion tla STA.

N aiut particuler: chertes cun trassa dl viac

Sot al pont dl menù “servisc y cuntat” sun chësc portal dla mubiltà possa l widget-orares unì cuncià ite sun uni plata web y unì adatà al bujën curespundënt, p.ej. cun n’adres de partënza o de destinazion prefisseda per la crissa online. I users giapa nsci na nfurmazion asvelta y detalieda sun ulache ie la fermeda plu daujin dla curiera o dla ferata o sun coche n possa ruvé plu saurì cun i mesuns publics ala destinazion crissa ora tl raion de nosta provinzia, cun leprò nce i trac da jì a pe. Per chëi y chëles che ne ie nia da tlo iel particularmënter de utl pudëi udëi la trassa ntiera dessenieda ite sun la cherta. Chësta chertes ie da udëi sun l portal dla südtirolmubiltà te de plu verscions y les dà na sëuravijion dla strutures y dla ufiertes dla mubiltà publica y sustenibla.