Orars 2022: I adorun Osta minunga!

Ince chësc ann á les zitadines y i zitadins la poscibilité da ortié osservaziuns sön i orars di bus y dla ferata. Dal 1. cina ai 15 de ma pól gní ortié osservaziuns sön i orars atuai a chësta misciun e-mail: 2022@suedtirolmobil.info. 

Le fin de chësta aziun é da ti dé a che che s’anüza dl bus y dla ferata la poscibilité da organisé para i orars dles feter 230 linies de bus y ferata, controlé sce i orars de partënza y coliamënt vá a öna cun i bojëgns y mostré sö ci che ne vá nia o mancia.

La partezipaziun direta dla jënt pro l’organisaziun di orars é gnüda a se le dé le pröm iade l’ann passé, aladô dla deliberaziun dla junta provinziala, cun suzes. L’Ofize Trasport de porsones á ciafé feter 400 propostes che revardâ les linies di bus y dla ferata desvalies por e-mail. Tröpes de chëstes propostes é bele gnüdes laurades ite ti orars da sëgn, avisa sciöche ince tröc d’atri coliamënc, sciöche preodü dal plan dla mobilité provinzial.

Chësc ann ne vára nia da dé jö n iudize sön i orars programá, mo ma sön i orars che vel sëgn, ajache al gnará strotoré en pert danü i sorvisc di bus cun l’assegnaziun nöia di sorvisc di bus extraurbans preodüda. Les segnalaziuns sön i orars che röia adalerch gnará a vigni moda ince chësc ann analisades avisa y laurades ite – tan inant che ara vá – ti orars dl dagní. Sambëgn él da tigní cunt che les mudaziuns che reverda l’orar dla ferata se ghira plü tëmp y pó porchël impormó gní realisades te n tëmp mesan.