Ala partezipaziun direta dla zitadinza ti vëgnel dé n gran pëis pro le plann provinzial nü por la mobilité y la logistica sostignibles. Cina ai 22 de ma vëgnel fat online n’inrescida.
Bele da edemes vëgnel lauré ala realisaziun dl plann provinzial nü por la mobilité y la logistica sostignibles. Chësc é le stromënt de planificaziun prinzipal por le svilup de döta la mobilité tl Südtirol. Le plann provinzial se conzentrëia sön la sostignibilité y le coliamënt y dess gní scrit tolon ite döta la popolaziun. "Al prozes por lauré fora le plann provinzial por la mobilité sostignibla laurunse deboriada cun les perts interessades, i comuns y cun les comunités raionales, sciöche ince dantadöt cun les zitadines y i zitadins. I orun ciafé sö sciöche la popolaziun se möi y de ci che ara á debojëgn y tó sö insciö les realtés locales tl plann provinzial", á sotrissé l’assessur provinzial por la mobilité Daniel Alfreider dala presentaziun dl’inrescida online 2030.suedtirolmobil.info
Planifiché döta la mobilité
I documënc de planificaziun é desvalis y vá dal program de de plü agn ala realisaziun de strades al plann por le clima cina al masterplan sön l’idrogen. An podess porchël pié ia dal laur fat y ponsé da planifiché se colian, á dit le diretur de repartiziun Martin Vallazza. Le plann dla mobilité prinzipal da sëgn dess gní lauré fora inant te n plann provinzial ampl por la mobilité y la logistica sostignibles: "La mobilité mëss gní plü sostignibla aladô dl prinzip: schivé, sposté, mioré", insciö á l’assessur provinzial Alfreider ressumé le travert dla junta provinziala de Balsan. La mobilité de indoman é sostignibla y coliada, sides por ci che reverda i prozesc (digitai) che ince le arjunje n post (a livel europeich). La planificaziun dla mobilité é porchël trö’ de plü co ma mëte a desposiziun linies dl bus o ressurses por i trus dla roda. "Por smendrí le trafich motorisé individual vál debojëgn de dötes les formes de mobilité y infrastrotöres tl respet de düc i faturs che condizionëia le comportamënt devers dla mobilité dla jënt“, insciö Alfreider.
Mobilité de induman: coliá a na moda sostignibla a döta l’Europa
I traverc prinzipai y i ciamps d’aziun dl plann provinzial nü é bele gnüs definis te n pröm momënt cun les rapresentanzes d’interes desvalies. Sëgn nen vára da trá ite ince la popolaziun a na moda che le plann vëgnes sostigní da tröpes porsones. "I adorun soluziuns inovatives por ti ester ales desfidades dla mobilité tl dagní y se colié damí tl’Europa", á sotrissé le coordinadú dl plann y espert de mobilité Stefano Ciurnelli. Le plan dess porchël n’avëi nia ma conseguënzes de sostignibilité sön le clima, mo bëgn ince soziales y economiches.
(USP)