Dal lunesc, 2 a n dumënia 8 d’agost 2021 resta la trat dla ferata danter l Prëner y Furtëza śareda defin. De gauja ie i lëures pra n puent dla ferata danter Freienfeld y Sterzing, che ie unic prugramei dala gestion dla rë dla ferates RFI.
Uni infrastrutura à de bujën de mantenimënt y ressanamënt, dantaldut na trassa de trasport internaziunel dassënn nuzeda sciche la linia dla ferata dl Prëner. Na bona pert di lëures de ispezion y mantenimënt sun la trasses dla ferata vën fata de nuet, ma n valguni de chisc lëures possa mé unì dejëuc cun l linëus dl di o se damanda che la trassa vënie śareda per de plu dis.
Agost: manco viagiadëures, manco ferates de marcanzia
Per l ressanamënt dl puent dla ferata sot al ciastel Sprechenstein à la sozieteies dla ferates talianes cris ora l agost ajache te chësc tëmp ne ie de viac degun sculeies y, aldò dla esperienza, degun penduleres, ma ënghe ajache l trasport de marcanzia ie bendebò limità pervia dla vacanzes. Y sci: ënghe d’agost dl 2018 fova la linia dla ferata dl Prëner śareda sun de plu trac pervia de lëures de costruzion y mantenimënt ti raions dl Virgl a sud dla stazion de Bulsan, dl Prëner – pra l tunel de Pflersch – y ënghe dala pert dl Tirol dl Nord danter Dispruch y Steinach.
Servijes de sustituzion per l trasport regiunel y a destanza longia
N cunlaurazion cun l Cumissariat dl Guviern y cun duta l’autoriteies cumpetëntes iesen tl departimënt dla Mubilità dla Provinzia śën tl lëur de urganisé i servijes de sustituzion ala ferata y de mëter a jì dut per pudëi ti unì ancontra l miec che la va ai viagiadëures.
Duta la nfurmazions te na udleda
Per i viagiadëures dl trasport regiunel
- L servisc de sustituzion ala ferata per ferates regiuneles (100’E) vën urganisà danter Furtëza y l Prëner, per n valguna ferates regiuneles-express vën l servisc de sustituzion urganisà nchin Bulsan.
- La curieres dl trasport de sustituzion regiunel ala ferata fërma tla stazions cun chësta ezezions: Pra Freienfeld vëniel mé fermà dala fermeda pra la streda statela dl Prëner, a Tluses pra la stazion dla curieres y pra la stazion de Bulsan dala fermeda “Ost A” dan l palaz provinziel 2, visavis dla frabica zentrela dla stazion.
- Danter Furtëza y Bulsan toma ntan chësc tëmp ora n valgun cunliamënc dla ferata.
- Tla curieres dl servisc de sustituzion ala ferata ne possen nia tò pea la roda.
Per i viagiadëures a destanza longia (EC Eurocity)
- La curieres de sustituzion per la ferates a destanza longia cuer zënza fermedes danterite chësta trasses: Dispruch – Bulsan y Dispruch – Furtëza.
- Partënza dla curieres de sustituzion: a Bulsan fërma la curieres de sustituzion per la ferates-EC tla streda G.-Garibaldi, chël uel dì, paralelamënter ala plataforma dla scina 1A dla stazion de Bulsan. A Furtëza fërma la curieres tla streda dla Stazion y a Dispruch pra la “Verladestelle”.
- Sun la trassa Bulsan-Prëner vel la chertes de viac Eurocity cun partënza y ultima fermeda Persenon, Furtëza o Prëner ntan la śareda nce per l trasport regiunel sun la ferates-R y sun la curieres dl trasport de sustituzion ala ferata 100E.
- La ferates Railjet Bulsan-Viena (RJX 184/185) vën canceledes zënza sustituzion ntan l tëmp dla śareda. L pèr de ferates EC86/EC87 (a / da Unieja) vën desvià via per Tarvis.
- Tla curieres dl servisc de sustituzion ala ferata ne possen nia tò pea la roda.