Bëgn trëi ofertes nöies él sëgn sön südtirolmubilitá: notizies atuales implü ince sön l’app, la poscibilité da te fá to liber di orars personalisé y l’opziun da salvé i resultac detaiá de tüa chirida di orars tl format pdf y i stampé sön papier.
La plata web y l’app südtirolmubilitá é nosc "contat diret" cun les porsones che s'anüza di mesi publics y ares vëgn tresfora miorades; i se porvun da amplié vare por vare nostes ofertes d'informaziun y da realisé i dejiders de nosta clientela. Cun la rubrica "News" te tignunse da atira inant tres informé ince tl’app: sön novités por ci che reverda le trasport local publich, sön le Südtirol Pass y sön i abonamënc o sön ci che al é bun da savëi dla mobilité sostenibla. Fazit: nosta clientela é sëgn dagnora informada le miú che ara vá sön i avisc dl trafich plü atuai y ciafa les news dla mobilité publica ince canche ara é söl iade.
To liber di orars personalisé
Oste te fá daldöt individulamënter to liber di orars? Sot al punt dl menü "Tabeles di orares da ciarië ju" sön la plata web aste sëgn la poscibilité da te chirí fora les linies dl bus y dla ferata che te adores y da te mëte adöm cun les tabeles aposta to liber di orars personalisé. Tüa brosciüra di orars privata poste tresfora ajorné o mudé, te la salvé tl format pdf y te la stampé.
Sëgn vára ince da se stampé i resultac detaiá dla chirida di orars online. Chësc ó dí: sce te chires sön la plata web n coliamënt dl bus o dla ferata da A a B, spo poste te desćiarié diretamënter la proposta che te vëgn fata cun düc i detais y les informaziuns che toca lapró y te la stampé te na forma saurida da lí y capí. Insciö acontentunse nosta clientela che ne s'anüza por ejëmpl nia de n smartphone o che se stampa plü ion, denanche pié ia, dötes les informaziuns sön i orars cun la descriziun dl iade y pó insciö se les tó para sön papier.
Nosta plata web y app gnará ince tl dagní ciamó potenziades y ampliades cun funzionalités nöies. I s'inconfortun da ciafé to feed-back y tües propostes te vigni momënt: contact@suedtirolmobil.info.