Dai 26 d’otober inant pón jí cun la cherta „KlimaTicket Ö“ n ann alalungia cun düc i mesi dl trasport publich te döta l’Austria.
Cun i obietifs dl clima de Paris dan i edli ciara sëgn l’Austria da sconé l’ambiënt: Na cherta anuala comota por düc i mesi dl trasport publich, dess fá a na moda che al sides plü saurí da tó le bus y la ferata da jí incërch, por schivé codes sön les strades. La cherta clima dl’Austria nöia conzed n azes ilimité a dötes les linies de trasport, chël ó dí a dötes les ferates, a düc i bus y a düc i trams dl trasport publich, cun lapró la “ÖBB” y la “Westbahn”. Al é ma stlüt fora val’ coliamënc dla ferata turistics.
I cosć
La cherta anuala normala costa 1.095 euro. Jonëza, seniors y porsones cun handicap paia n pü’ demanco, chël o di 821 euro. Damperfora vëgnel conzedü reduziuns di prisc. La cherta por la familia costa 1.205 euro, ara vel por na porsona adulta y alplü cater mituns/mitans che á danter sis y 14 agn; al ne vá nia debojëgn de n zertificat de familia.
Ince i Bundesländer sostëgn la cherta anuala
Dlungia la cherta clima dl’Austria vëgnel ince planifiché verjiuns regionales por n Bundesland o por val’ regiuns. Te val’ posć él bele chertes de linia anuales, sciöche por ejëmpl tl Vorarlberg, tl Tirol, a Salzburg o a Viena, y tosc tl’ Austria Alta y tla Stiria. La responsabilité dla realisaziun y organisaziun dla cherta clima regionala é dl Land.
Saurí da mudé da n meso al ater: le Südtirol Pass sciöche pionier
Cun gran interes ti é i stac vijins, dantadöt l’Austria, stá do al Südtirol Pass al scomenciamënt dl 2012. L’assessur por la mobilité da inlaota Thomas Widmann y so team á presenté cotan de iadi le conzet te gremiums desvalis. L’idea de basa á albü suzes: degun labirint de chertes y tarifes, degügn problems cun automac de chertes, mo bëgn ma öna na cherta che vel tres te döta la provinzia. Te vigni caje á le Sütirol fat la dërta cossa: I numeri d’adoranza dl trasport publich é jüs sö cotan cun le Südtirol Pass y aldedaincö él 235.000 porsones, chël ó plü co mesa la popolaziun, che á na cherta anuala por la mobilité publica.
Dötes les informaziuns sön la cherta clima é da ciafé chilo