Südtirol Guest Pass
Vacanza tl Südtirol: Rodé fora por cités y contrades cun na cherta sora
Tröc eserzizi d'alberch dl Südtirol ti mët a desposiziun a sü sciori y a sües sciores le Südtirol Guest Pass: na cherta cun chëra che ara vá da s'anuzé saurí y a na moda flessibla de düc i mesi dl trasport publich.
Val' variantes dl Südtirol Guest Pass, a chëres che an ti dij museumobil, conzed ince da jí a ti ciaré a tröc museums y coleziuns y s'anuzé de ofertes surapró tl raiun dla vacanza. Informaziuns plü menüdes é da ciafé ti eserzizi d'alberch o ti ofizi por le turism dl post.
Te ci format ciafon pa le Südtirol Guest Pass?
- La cherta de papier é coliada al tëmp de sojornanza dl scior/dla sciora y vel alplü 7 dis dala pröma convalidaziun (dis de calënder intiers). Tl caje de na sojornanza de passa 7 dis dá fora l'eserzize d'alberch ciamó n Südtirol Guest Pass;
- la cherta sciöche PDF digital por aparac mobii (smartphones) pó gní adorada diretamënter sön le smartphone o stampada fora y tuta para sön papier;
- la cherta digitala pó gní ajuntada te n "tacuin" (wallet) sön le fonin (por ej. Google Wallet, Apple Wallet o na app somiënta).
Validité: Le Südtirol Guest Pass tla forma digitala ciafon ma ti eserzizi d‘alberch che fej para y vel por la dorada dla sojornanza (dales 00:00 dl de che an röia adlerch cina ales 24:00 dl de che an s’un vá).
Co funzionëia pa le Südtirol Guest Pass?
Vigni iade che an pëia ia cun n meso dl trasport publich mësson convalidé le Südtirol Guest Pass pro l'aparat de convalidaziun bröm sön le bus, tla staziun dla ferata o dl implant portamunt. Les chertes digitales á n QR-code, che mëss gní lit dal sensur che é tla pert dessot dl aparat de convalidaziun.
- Vel pa le Guest Pass? N OK vërt sön le monitor o n segnal acustich confermëia la convalidaziun.
- Ci sozedel pa sce la cherta ne vel nia? Sce al vëgn sö na resposta negativa pro la convalidaziun ne vel le Guest Pass nia y an ne pó nia l'adoré.
Olá ne vel pa le Südtirol Guest Pass nia?
Le Südtirol Guest Pass ne vel nia por i iadi cun les ferates che vá lunc (p.ej. EC, Railjet, Frecciarossa, Frecciargento, Italo) y les ferates regionales sön la trassa Prener-Desproch y Sanciana-Lienz, da tó para la roda y tiers y gnanca sön chëstes linies dl bus turistiches:
- Linia 444 Toblach – Misurina – Ütia Auronzo/Trëi Pizes de Lavarëi;
- Linia 440 Kreuzbergpass – Fischleintal – Le Sest;
- Shuttle linia 439 Valsperch – Braies;
- Linia 442 Toblach – Niederdorf – Braies dai 10 de messé ai 10 de setëmber dl 2024.