Le Coronavirus ti dá ince da fá ai tecnics de südtirolmubiltá che se dá jö cun i orars: l’oferta di mesi dl trasport publich y insciö ince i orars é gnüs mudá ad hoc y adatá ai bojëgns ne sá ma nia tan de iadi ti ultimi mëisc.
Deache proscima edema, chël ó dí da en lönesc, 16 de novëmber inant, vëgnel por intant stlüt les scores, vëgnel straiché pro i bus düc i iadi di scolars. Al é chi iadi che, aladô dles tabeles di orars, vëgn pitá surapró i dis de scora y che á dlungia n „S“. Sciöche ara jará inant les proscimes edemes, ne savunse nia ciamó; al depënn ince dal numer dles infeziuns da Covid-19.
A vigni moda vëgnel aconsié da ciaré do i orars ma online tres l‘archirida di orars sön chësta plata web o sön l‘app, ajache les mudaziuns di orars vëgn injuntades tresfora ti sistems de dac. Al momënt ne vára nia da mëte a desposiziun i orars ince te tabeles te chësc tëmp malsigü, ajache al vá debojëgn da mudé tan sovënz i orars. Chësc reverda sides les tabeles di orars tl format pdf sön la plata web che ince i orars tacá fora pro les fermades.
L’assessur por la mobilité Daniel Alfreider apelëia indô ales zitadines y ai zitadins: „Por che al vëgnes garantí i sorvisc de basa tles profesciuns relevantes por le sistem, él important che che che laora y ne sciafia nia da lauré te homeoffice, pois jí a lauré y ince indô rové a ciasa. Di mesi pón ince s’anuzé por rajuns liades ala sanité y por rajun d’emergënza. Ince i scolars che á le dërt da s’anuzé dla didatica en presënza pó adoré i mesi.“ Al é tres ciamó obligatore da se vistí la maschera sön i mesi dl trasport publich y pro les fermades, da se tigní ales regoles d’igiena y da respeté la destanza de segurëza y avëi para na cherta varënta, insciö l’assessur provinzial. Ciarede da schivé, sce ara vá, da tó i mesi tratan i orars prinzipai. Sön i mesi dl trasport publich pól inant ma gní anuzé le 50 porcënt dla capazité autorisada.