N coliamënt danter i mesi publics desvalis vëgn tres plü important. Porchël vëgn le Plann dla mobilité provinzial scrit danü, aladô de na deliberaziun dla Junta provinziala.
Sciöche l'assessur por la mobilité Daniel Alfreider alza fora "s'á la mobilité y la logistica svilupé y mudé ti ultims agn: l'oferta mëss s'orienté al bojëgn de mobilité dla jënt y porchël mëssera gní ponsada y programada te na manira completa, coliada y intermodala." Pro chësc á la sostignibilité n'importanza zentrala y por ti podëi pormez ai contribuc dl'UE fora di fonds EFRE, ESF y FSC mëssel implü, aladô de Alfreider, gní ademplí certes condiziuns. L'Uniun Europeica mët a desposiziun ti proscims agn tröpes ressurses por realisé proiec tl setur dla mobilité.
La sostignibilité é fondamentala
N pröm vare tl'elaboraziun dl Plann nü é gnü fat dala Junta provinziala ai 15 de forá canche al é gnü fat fora ci repartiziuns provinziales y partner desvalis che laurará para. "Por ti ester manëcia ales sfidades dla mobilité dl dagní orunse tó ite porsones espertes, grups d'interes y sambëgn ince les zitadines y i zitadins" dij l'assessur. Le Plan dla mobilité provinzial dl 2018 che é dötaurela atual é bëgn impormó gnü realisé ma en pert, mo impó dessel gní svilupé inant te n "Plan provinzial por na mobilité y logistica sostignibles".
Cina sëgn ê le trasport local publich l'aspet plü important sön le Plan. Sëgn se tratera da orienté le Plan ai obietifs dla sostignibilité provinziai. Implü dess le Plan gní amplié cun aspec importanc dla mobilité te süa complessité cun lapró i planns spezialistics corespognënc. Al gnará por ejëmpl tut ite temesc zentrai sciöche la mobilité dla roda, le Digital Green Corridor dl Prener, la gestiun dla mobilité te raiuns sensibli o la gestiun dla lerch da parché. Por le pröm iade dess le Plan ince traté nia ma le trasport de posones mo ince le trasport de marcianzia. Dantadöt por i Comuns mo ince por döta na ligna de Repartiziuns provinziales é le Plan na fondamënta importanta por d'atri proiec.
Reelaboraziun partezipativa te döes fases
Le Plan dla mobilité provinzial vëgn ciaré jö te döes fases: cina d'aurí dl 2022 gnarál definí les diretives y i obietifs dla mobilité dl Südtirol consultan y tiran ite les rapresentanzes di interesc plü importantes. Spo gnará le Plann sotmetü al’aprovaziun dla Junta provinziala por ademplí da öna na pert les condiziuns iuridiches y dal'atra por podëi ciafé sovenziuns dal'Uniun Europeica. Te na secunda fasa gnará le documënt strategich por la mobilité amplié cun planns spezialistics desvalis, en pert bele danman, sciöche por ejëmpl la Plan dla mobilité dla roda. (LPA)
Foto:LPA/helios