Euregio Family Pass
Furné a bon priesc tl Südtirol y se nuzé te truep luesc de de bona ufiertes
L Euregio Family Pass ie na cherta de viac persunela y eletronica sun basa anuela cun tarifes alesiredes per la mubiltà publica tla provinzia. Uni genitor cun almanco un n mut/una na muta che ne à mo nia arjont 18 ani possa se l damandé y l funzionea coche cherta de viac aldò dl prinzip: plu chilometri che l vën fat te n ann y manco che l chilometer tarifer costa man man.
L priesc dl viac per uni trassa vën trat ju automaticamënter pra la cunvalidazion aldò dla sort de cherta de viac: o periodicamënter tres l contcurënt bancher o tres detrazion dl cost de uni viac dala soma ciarieda su.
L Euregio Family Pass ie tl medemo mumënt nce na cherta de vantaje (cherta da mustré ca) te truepa butëighes y per truepa ufiertes tl Südtirol, tla provinzia de Trënt y tl Bundesland Tirol. Na lista atuela de chi che pieta vantajes ie publicheda sun la plata web www.provinz.bz.it/familypass.
Da nuzé saurì y a na maniera flessibla sciche cherta de viac:
- tl raion südtirolmubiltà cun leprò la ferates regiuneles nchin Trënt;
- ala tarifa VVT / ÖBB nce sun la linies dla ferata Prëner-Dispruch coche nce Innichen/Vierschach-Lienz; sce n uel possen nce registré la cherta vantaje ÖBB-Vorteilscard;
- da tré ju la tarifa dl di canche n tol pea na roda;
- da tré ju l priesc de viac per tieres;
- per viages cun la curieres Nightliner.
L Euregio Family Pass ne vel nia per viages sun ferates a destanza longia (EC, Freccia, Italo, Railjet y n.i.).
L Euregio Family Pass possa unì damandà online da genitores y persones cun ncëria d’educazion cun residënza tla provinzia de Bulsan cun almanco un n mut/una na muta sota 18 ani. Persones dl Südtirol che ie scrites ite tl register A.I.R.E. (register di zitadins y dla zitadines talianes che viv oradecà) de n chemun dla provinzia de Bulsan cun almanco un n mut/una na muta sot a 18 ani possa se damandé l Euregio Family Pass tres e-mail: suedtirolpass@suedtirolmobil.info
L Euregio Family Pass ie da damandé singulermënter y persunalmënter per uni persona.
L priesc de n viac cun la curiera o la ferata vën a se l dé dai chilometri furnei o respetivamënter fissei y l priesc dl livel tarifer curespundënt. Via per l ann, cun l avané di chilometri furnei vëniel man man aplicà livei tariferes defrënc. Cun uni ann de referimënt (for dala data dla prima ativazion dl Euregio Family Pass) vën l cont chilometrich dl Euregio Family Pass inò metù a nul y l scumencia inò l livel tarifer 1.
L priesc dl viac vën calculà nsci:
| Livel tarifer | Chilometri furnei tl tëmp de n ann | Priesc dl viac per chilometer tarifer |
|---|---|---|
| 1 | 1 nchin 1.000 km | 10 Cent |
| 2 | 1.001 nchin 2.000 km | 7 Cent |
| 3 | 2.001 nchin 10.000 km | 2 Cent |
| 4 | 10.001 nchin 20.000 km | 2 Cent |
| 5 | da 20.001 km | 0 Cent |
| soma mascima al ann | 530 Euro |
L priesc plu bas per uni viac ie de 10 km-tariferes. Per viages de cunliamënt cun curieres te duc i luesc ora che Bulsan y Maran vëniel ratà n priesc minim de 5 km-tariferes.
Curieres de zità a Bulsan y Maran y Citybus: Duc i viages tl tëmp de 60 menuc tl medemo raion tarifer vën ratei sciche un n viac.
Tarifa al di mascima 15 Euro: Per i viages fac dai passajires vëniel trat ju al plu 15 Euro al di, chësc curespuend al priesc de na Mobilcard per n di. Leprò vëniel scencajo ratà viages sun la trasses dla ferates Prëner-Dispruch y Innichen-Lienz, viages cun la curieres Nightliner y l trasport de tieres y rodes.
L Euregio Family Pass possa unì damandà online sun chësta plata web. N adrova:
- i dac anagrafics dla persona che fej la dumanda
- l numer de codesc fischel *
- na copia digitela (foto) dla cherta d’identità
- la coordinedes bancheres (IBAN, SWIFT / BIC Code, banca y agenzia) per i tlienc y la tlientes che uel paië si viages tres scudimënt dla banca (postpaid).
* Chi che ne à degun codesc fischel talian possa se l damandé pra l’Agenzia dla Ntredes.
Pra la dumanda online possen nce adurvé na tle d’azes digitela (SPID o cherta di servijes ativeda cun letëur). Pernanche l SPID o la cherta di zitadins per i servijes online dl Euregio Family Pass vën adurveda ie l azes al cont de nuzeda dadedò mé plu puscibl cun la tle d’azes digitela.
Canche n fej la dumanda iel da crì ora coche n ulëssa unì nfurmei (SMS o e-mail) coche n ulessa plu gën paië: tres cherta postpaid (chësta vën cunsieda ajache l cost di viages vën trat ju a na maniera saurida diretamënter dal cont bancher) o tres cherta prepaid (chësta ie da ciarië regulermënter cun na cërta soma de scioldi).
Do che n à fat la dumanda vën l Euregio Family Pass mandà a cësa per posta cun na plata de nfurmazions per l’ativazion y la nuzeda dla cherta.
Canche n fej dumanda cunsiëien de njinië ite n cont de nuzeda persunel online. Tres chësc portal possa duc i servijes digitei che à da nfé cun l Euregio Family Pass unì dejëuc y chi che furnea possa for tenì de uedl i viages fac cun la curieres y la ferates, l cont chilometrich, l livel tarifer atuel, i ciariamënc fac o la contes Euregio Family Pass giapedes. Oradechël possen fé na lamentanza sce l fossa unì fat n fal n cont de vel’ atribuzion de n viac y l lascé cumedé.
L Euregio Family Pass vën mandà a cësa per posta do che n l à damandà online. Dan che n l adrova l prim iede muessel unì ativà:
- online tres l cont de nuzeda persunel dajan ite l numer dl Euregio Family Pass;
- pra la purteles de chertes de viac autorisedes y la lueges de venduda südtirolmubiltà;
- per telefon pra l Zёnter de servisc y nfurmazion südtirolmubiltà +39 0471 220 880 (da lunesc a vënerdì dala 8:00 ala 18:00). L ie da dé sëura l numer dl Euregio Family Pass y l numer de codesc fischel.
Pra l Euregio Family Pass cun cuntrat postpaid (SEPA Direct Debit) vën la spëises de viac trates ju dal cont de banca uni doi mënsc, tl cajo de somes de ndut manco de 10 euro uni cater mënsc.
La maniera de co giapé la conta possa unì crissa ora sun l cont de nuzeda y mudeda canche mei: Giapé la conta sun l cont de nuzeda online ie debant. Giapé la conta per posta, sce n uel cun la lista di viages fac, costa 2 euro per conta.
L Euregio Family Pass (cherta prepaid) possa unì ciarià su nsci:
- cun la cherta de credit (Visa o Mastercard) / pagoPA tres l cont de nuzeda persunel online o tres homebanking (chësc va mé tres la banches autorisedes);
- pra la purteles y lueges de venduda südtirolmubiltà;
- pra i automac de chertes de viac;
- sun la curieres regiuneles; te chësc cajo possel duré n valgun dis nchin che l vën registrà che n à ciarià la cherta; l Euregio Family Pass possa a uni moda mpò unì adurvà.
Valor minim che muessa unì ciarià su: 20 Euro.
Credit de rest minim: 10 Euro; sce n va daujin ma n ne va nia sota chësta soma vëniel mustrà su pra la cunvalidazion sun l display coche ndicazion che l credit va a piz.
Sce l credit de rest sun l Euregio Family Pass va sota nul (saldo negatif) ne possa la cherta nia plu unì ciarieda tla curiera. L valor de ciarieda muessa te chësc cajo vester de almanco 30 Euro (20 Euro plus 10 Euro de credit de rest minim).
L Euregio Family Pass vel n ann dala prima cunvalidazion. Do che l ie passà n ann vën la validità slungëda automaticamënter de n auter ann. L cont chilometrich dl Euregio Family Pass vën inò metù a nul cun uni ann de referimënt nuef, l scumëncia inò l prim livel tarifer.
Sce l Euregio Family Pass ne vën nia adurvà per dut n ann de validità vëniel deativà d’ufize. Na reativazion plu tert ie fo inò puscibla: prëibel cuntatëde per chësc fin l zënter de servisc y nfurmazion sot al numer: n. 0471 220 880 o tres e-mail contact@suedtirolmobil.info
La tarifes alesiredes dl Euregio Family Pass vel nchin che l mut plu jëun o la muta plu jëuna à arjont 18 ani. Do chësta data vëniel metù ndroa automaticamënter la taraifa normala dl Südtirol Pass curespundënta al numer de chilometri fac. La cherta possa unì adurveda inant tl trasport publich local.
Sce n se pierd la cherta dl Euregio Family Pass, sce la vën rubeda o sce n vëij che la ie danejeda possen se damandé n duplicat per l priesc de 20 Euro, y chël:
- online tres l cont de nuzeda persunel;
- pra la purteles y lueges de venduda südtirolmubiltà.
Metëde verda: La dumanda ne possa nia unì desdita.
Sce n ne vëij pra la cherta dl Euregio Family Pass degun dann ma la cherta ne funzionea nia pervia de n defet o n deslisamënt dl material possen se damandé pra la lueges de venduda de chertes südtirolmubiltà na copia dla cherta. Chësta ie debant.